Organisashon di Fundashon Fiansa Popular

Historia i Status aktual

Fundashon Kas Popular  a wòrdu fundá dia 5 di febrüari 1979 i kasi den e mesun aña a kuminsá duna fiansa na kumpradónan di kas i esnan ku riba nan mes ta bai konstruí nan kas. 

Pero riba konseho di CBCS, FKP lo mester a transferí su aktividatnan finansiero na un entidat hurídiko independiente.
Esaki debí na e Ordenansa Nashonal riba Supervishon di Banko i Krédito.
FKP lo por a realisá su aktividatnan sekundario di préstamo pa solamente un balor te ku 1 mion florin antiano.

Pe motibu aki FKP a funda Fundashon Fiansa Popular na 1980 ku e e meta general pa promové bibienda na Kòrsou, esaki dor di yuda e residentenan ku entrada mas abou te ku esnan di e parti mas abou di klase media ku fiansa pa asina yega na nan propio kas.
Huntu ku esaki e meta tambe ta pa duna fiansa pa por drecha o mehorá bibienda.

E resultado finansiero di FFP tin ku kontribuí pa generá entrada pa FKP di manera ku esaki por sigui mantené i desaroyá bibienda sosial den futuro.

E maneho di FFP tin komo meta pa mantené un ekilibrio entre e kumplimentu ku metanan sosial i logra un operashon di forma finansieramente responsabel.

Struktura Fundashon Fiansa Popular

FFP ta wòrdu manehá dor di un "Raad van Bestuur" di 2 Direktor, nombrá dor di un Konseho di Supervishon di e fundashon (Raad van Commissarissen).

E Konseho di Supervishon di FFP ta konsistí di 5 miembronan ku tin eksperensia den un òf mas di e siguiente áreanan : finansa / ekonomia empresarial, lei, kontabilidat i atministrashon empresarial. Un miembro mester tin eksperensia bankario. 

Produktonan y Servisionan

E produkto i servisionan ku FFP ta bai komersialisá ta lo siguiente:

• Hipotek  pa esnan ku ke kumpra un kas i pa esnan ku ke traha nan propio kas; na un máksimo di 450.00 Florin Antiano i un término di máksimo 35 aña pa paga bèk.

• Fiansa personal pa drecha o renobá kas; na un máksimo di 50.000 Florin Antiano i un término di máksimo 10 aña pa paga bèk.

• Guia i supervishon di konstrukshon kombiná ku fiansa na klientenan ku ke konstruí ò renobá nan kas.